Trosolwg o'r swydd

Ydych chi'n fferyllydd deinamig a brwdfrydig sy'n chwilio am gyfle i wneud gwahaniaeth gwirioneddol ym maes gofal brys ac argyfwng? Ymunwch â'n tîm arloesol yn Ysbyty Gwynedd, gan weithio fel rhan o'r tîm derbyn wrth y drws ffrynt o fewn yr Adran Achosion Brys, Gofal Brys yr Un Diwrnod, a'r wardiau Derbyniadau Meddygol a Derbyniadau Llawfeddygol.

Dyma gyfle cyffrous i weithio ar flaen y gad ym maes fferylliaeth glinigol mewn amgylchedd cyflym, sy'n canolbwyntio ar y claf. Byddwch yn rhan annatod o'r tîm amlddisgyblaethol, gan gefnogi defnydd diogel ac effeithiol o feddyginiaethau o'r adeg y mae'r claf yn dod i mewn i ofal ysbyty, hyd at gefnogi'r broses o drosglwyddo gofal y claf yn ôl i'r gymuned.

Rydym wedi ymrwymo i ddarparu'r profiad dysgu a chefnogaeth gorau posibl i fferyllwyr, ac rydym yn credu bod y swydd hon yn gam delfrydol tuag at ymarfer arbenigol/uwch. Bydd y rôl yn rhoi cyfle i chi ddatblygu eich sgiliau rhagnodi presennol, a chewch gefnogaeth i gofrestru ar lwybr ymarfer clinigol uwch ac i ennill cymhwyster craidd lefel uwch gyda Choleg Brenhinol Fferylliaeth. 

Mae ein tîm fferylliaeth glinigol yn darparu gwasanaeth o ansawdd uchel sy'n canolbwyntio ar y claf, gan sicrhau defnydd diogel ac effeithiol o feddyginiaethau ar draws y gymuned iechyd integredig. Fel fferyllydd o fewn ein tîm, byddwch yn darparu gofal fferyllol rhagorol ac yn gwneud y gorau o ddefnydd meddyginiaethau er mwyn sicrhau'r canlyniadau gorau posibl i'n cleifion.

Prif ddyletswyddau'r swydd

Bydd eich cyfrifoldebau yn cynnwys:

• Darparu mewnbwn fferylliaeth glinigol arbenigol i gleifion yn ein hardaloedd derbyn wrth y drws ffrynt a derbyniadau.
• Defnyddio eich cymhwyster rhagnodi annibynnol i gefnogi optimeiddio meddyginiaethau a chynllunio rhyddhau cleifion.
• Darparu gwasanaethau fferylliaeth glinigol ehangach o fewn yr ysbyty.
• Cydweithio'n agos â gweithwyr meddygol, nyrsio a gweithwyr iechyd proffesiynol eraill i sicrhau gofal di-dor i gleifion.
• Cyfrannu at ddatblygu gwasanaethau a mentrau gwella ansawdd.
• Cefnogi datblygiad gweithwyr fferylliaeth proffesiynol presennol a'r dyfodol, yn ogystal â gweithwyr gofal iechyd proffesiynol eraill, drwy fentora clinigol.

Rydym yn cydnabod mai gan fferyllwyr fel chi, sydd â'r ysgogiad a'r gallu i lwyddo, y daw arweinwyr y proffesiwn yn y dyfodol. Bydd eich proffesiynoldeb, eich sgiliau rhyngbersonol rhagorol a'ch brwdfrydedd yn eich galluogi i wneud cyfraniad gwerthfawr i'n gwasanaeth ac i fod yn aelod allweddol o'n tîm fferylliaeth glinigol. Ein huchelgais yw darparu gofal o ansawdd uchel a gwreiddio diwylliant o welliant parhaus.

Bydd cyfleoedd i ddatblygu sgiliau addysg a hyfforddi drwy gysylltiadau ag Ysgol Fferylliaeth Prifysgol Bangor, a sefydlwyd yn ddiweddar, a byddwch yn cymryd rhan yn hyfforddiant clinigol a goruchwyliaeth myfyrwyr fferylliaeth israddedig, aelodau o'r tîm fferylliaeth, yn ogystal â chydweithwyr meddygol a nyrsio.

Gweithio i'n sefydliad

Os ydych yn mwynhau her, gydag angerdd i helpu eraill neu'n dymuno dechrau o’r newydd, yna mae gan Fwrdd Iechyd Prifysgol Betsi Cadwaladr (BIPBC) Gogledd Cymru yr holl gynhwysion sydd eu hangen arnoch. Ni yw'r sefydliad iechyd mwyaf yng Nghymru, gan ddarparu ystod lawn o wasanaethau cychwynnol, cymuned, iechyd meddwl ac ysbytai llym a dewisol i boblogaeth o ryw 700,000 o bobl ar draws Gogledd Cymru. Ymunwch â'n tîm a chael y cymorth sydd ei angen arnoch, yn unol â’n Gwerthoedd Sefydliadol a’n fframwaith galluedd 'Balch o Arwain'.

Mwynhewch fod yn rhan o weithio gydag arweiniad ymroddedig ar bob lefel, a chael sicrwydd ein bod yn ymrwymo i hyrwyddo cydraddoldeb ac amrywiaeth, ac yn falch o groesawu ymgeiswyr o dan y cynllun "Cyflogwr Hyderus o ran Anabledd".

Gwiriwch eich cyfrif ebost yn rheolaidd. Bydd ymgeiswyr llwyddiannus yn cael yr holl ohebiaeth recriwtio drwy’r cyfeiriad ebost a gofrestrwyd ar y ffurflen gais.

Caniateir i geisiadau gael eu cyflwyno yn y Gymraeg. Ni fydd cais a gyflwynir yn y Gymraeg yn cael ei drin yn llai ffafriol na chais a gyflwynir yn Saesneg.