NHSJobs.com

Trosolwg o'r swydd

Mae gan wasanaeth deieteg cymunedol BIP Caerdydd a’r Fro gyfle i ddeietegwyr band 5/6 ychwanegol ymuno â’n gwasanaeth rheoli cyflyrau cronig prysur yng Nghanolfan Iechyd Glan yr Afon. Bydd y rolau ychwanegol yn galluogi’r tîm i wella darpariaeth gwasanaethau diabetes cymunedol ochr yn ochr â’n rhaglenni rheoli pwysau sydd wedi’u sefydlu ers tro. Bydd yr ymgeiswyr llwyddiannus yn gyfrifol am reoli llwyth achosion arbenigol o ddydd i ddydd gan gynnwys diabetes math 2 a rheoli pwysau.

Mae'r swyddi ar agor i ddeietegwyr band 5 a band 6.  Os byddwch yn llwyddiannus fel deietegydd band 5 byddwch yn cael eich cefnogi drwy hyfforddiant a goruchwyliaeth i gyflawni cymwyseddau band 6 i'ch galluogi i symud i'r swydd barhaol band 6. Croesewir ceisiadau ar gyfer y swydd band 6 hefyd gan ddeietegwyr sydd â phrofiad perthnasol.

Mae’r gwasanaethau yn cynnwys addysg grŵp, ymgynghoriadau rhithwir a chlinigau arbenigol ar draws ardal ddaearyddol Caerdydd a'r Fro.  Cewch gyfle i ennill sgiliau pellach drwy drefniant cylchdroi mewnol o fewn y tîm mewn meysydd o addysg diabetes arbenigol; gwasanaethau rheoli pwysau amlddisgyblaethol arbenigol a gordewdra ymysg mamau.

Bydd angen i'r ymgeisydd llwyddiannus ddangos sgiliau cyfathrebu rhagorol gan ddefnyddio dull Cyfweld Ysgogiadol sy'n canolbwyntio ar yr unigolyn.   Byddai profiad o reoli pwysau a diabetes math 2 o fantais ond darperir hyfforddiant.

Prif ddyletswyddau'r swydd

Yn gweithio ym maes arbenigol deieteg rheoli cyflyrau cronig ar gyfer clefyd y siwgr Math 2 a Rheoli Pwysau.  Yn gyfrifol am ddatblygu, darparu a gwerthuso’r gwasanaeth deieteg ar gyfer y maes arbenigol Cyflyrau Cronig, clefyd y siwgr a rheoli pwysau’n bennaf, gan gynnwys blaenoriaethu a rheoli llwyth achos cymhleth iawn gan ddefnyddio egwyddorion sy’n canolbwyntio ar y cleient sy’n seiliedig ar dystiolaeth i asesu, cynllunio, gweithredu a gwerthuso ymyriadau deietig yn y lleoliad cymunedol gan gynnwys ymyriadau grŵp ac un i un.

Bydd angen i'r ymgeisydd llwyddiannus ddangos sgiliau cyfathrebu rhagorol, dull gweithredu ymarferol, blaengaredd o ran datblygu a gwerthuso gwasanaethau a'r gallu i weithio mewn tîm.

Mae gofyn i chi deithio o amgylch Caerdydd a'r Fro fel rhan o'r rôl hon, gan gynnwys cario offer, ac efallai y bydd angen ychydig o waith gyda'r nos ac ar benwythnos.

Rydym yn chwilio am rywun sy'n rhannu ein gwerthoedd:

• Mae’r bobl rydym yn eu gwasanaethu a’r bobl rydym yn gweithio â nhw yn bwysig gennym ni.
• Rydym yn ymddiried yn ein gilydd
• Rydym yn parchu ein gilydd
• Rydym yn cymryd cyfrifoldeb personol
• Rydym yn trin pobl â charedigrwydd
• Rydym yn gweithredu â gonestrwydd

Bydd disgwyl i ddeiliaid y swydd ymddwyn yn unol â’n gwerthoedd bob amser a dangos ymrwymiad wrth ddarparu gwasanaethau o safon uchel i gleifion.

Mae'r gallu i siarad Cymraeg yn ddymunol ar gyfer y swydd hon; mae croeso i siaradwyr Cymraeg a/neu Saesneg wneud cais.

Gweithio i'n sefydliad

Bwrdd Iechyd Prifysgol Caerdydd a’r Fro yw un o’r Byrddau Iechyd Integredig mwyaf yn y DU, yn cyflogi dros 15,000 o staff ac yn darparu dros 100 o wasanaethau arbenigol. Mae gennym amrywiaeth o yrfaoedd i’w cynnig ar draws 6 safle ysbyty. Gan wasanaethu tua 500,000 o bobl sy’n byw yng Nghaerdydd a’r Fro, ein ffocws yw anghenion iechyd a gofal ein poblogaeth leol a gwaith partneriaeth i ddatblygu gwasanaethau rhanbarthol.

Ein cenhadaeth yw “Gofalu am Bobl, Cadw Pobl yn Iach”, a’n gweledigaeth yw y dylai siawns pob unigolyn o fyw bywyd iach fod yn gyfartal. Fel sefydliad rydym yn ddiedifar uchelgeisiol dros iechyd ein poblogaeth, gan ymateb i heriau heddiw ac yfory drwy ein strategaeth 10 mlynedd, Llunio ein Llesiant i’r Dyfodol. Rydym yn cyfrannu at Gymru iachach, gyda phwyslais mawr ar arloesi a gwella, gan ddysgu oddi wrth eraill ledled y byd ac arwain y ffordd mewn ymchwil glinigol. Mae gwaith partneriaeth yn gadarn yng Nghaerdydd a’r Fro, ac rydym yn gweithio’n agos gyda’n staff a’n cymuned.

Mae Caerdydd, prifddinas ffyniannus Cymru, yn ddinas wych i fyw a gweithio ynddi sy’n cynnig llwyth o atyniadau chwaraeon, celfyddydau a diwylliannol. Wedi’i leoli i’r gorllewin o Gaerdydd, mae Bro Morgannwg yn cynnig cyfuniad o gefn gwlad hardd Cymru ac arfordir naturiol dramatig. P’un ai’n fywyd dinesig neu’n fywyd gwledig, mae Caerdydd a’r Fro yn cynnig y gorau o’r ddau fyd.