NHSJobs.com

Trosolwg o'r swydd

Gwahoddir ceisiadau am swydd Radiolegydd Ymgynghorol gydag is-ddiddordeb mewn radioleg gastroberfeddol, oncoleg a chyhyrysgerbydol, ond rydym yn fwy na pharod i drafod unrhyw ddiddordebau arbenigol eraill. Bydd deiliad y swydd yn gweithio yn Ysbyty Gwynedd, Bangor, ond bydd yn rhan o dîm amlddisgyblaethol brwdfrydig sy'n cefnogi gwasanaethau presennol ar gyfer rhanbarth y Gogledd.

 

Bydd yr ymgeisydd llwyddiannus yn cyfrannu at lwyth gwaith ehangach yr adran yn dibynnu ar drafodaethau ynghylch y cynllun gwaith, gan gynnwys radioleg gyffredinol, rotas ar alwad ac addysgu radiolegwyr dan hyfforddiant, israddedigion ac aelodau eraill o staff yr ysbyty.

Caiff trefniadau gweithio hyblyg eu hystyried ac rydym yn fwy na pharod i drafod eich gofynion a sut y gellid eu bodloni.

Mae gennym gysylltiadau cryf â Phrifysgol Cymru, Bangor a byddai cyfle i ymgeiswyr ddatblygu cysylltiadau ymchwil a/neu addysgu â'r Brifysgol.

Prif ddyletswyddau'r swydd

Cynllun swydd 10 sesiwn.Ar alwad – 1 mewn 10 ar hyn o bryd neu'n llai aml, gydag adnoddau cyflenwi arfaethedig. MBydd gan bob radiolegydd gyfrifoldebau ym maes addysgu, sicrhau ansawdd, a rheoli gwasanaethau o fewn eu meysydd arbenigol. Caiff y swydd hon ei hysbysebu â diddordeb mewn radioleg gastroberfeddol/oncoleg/cyhyrysgerbydol er mwyn cyfrannu at y diddordeb is-arbenigol hwn.  Mae'r ganolfan radiotherapi yn Ysbyty Glan Clwyd ond mae canolfan gemotherapi yn y tri safle. Byddai delweddu trawsadrannol yn rhan bwysig o gynllun swydd deiliad y swydd. Mae adran orthopaedeg fawr hefyd gydag 14 o glinigwyr ymgynghorol yn darparu llawdriniaethau trawma a llawdriniaethau dewisol ar y breichiau a'r coesau. Mae clinigwyr sy'n arbenigo yn y dwylo, y breichiau a'r coesau, gan gynnwys llawfeddygon adluniol, ar y safle. Mae'r canolfannau atgyfeirio trydyddol yn cynnwys Croesoswallt, Manceinion Fwyaf, Gwasanaeth Sarcoma Meinwe Meddal Croesoswallt a Birmingham. Mae cyfle i ymgymryd â sganiau uwchsain a phigiadau cyhyrysgerbydol, MR gan gynnwys arthrograffi, CT a biopsïau esgyrn os hoffai deiliad y swydd ddatblygu ei ddiddordeb yn y maes cyhyrysgerbydol.

Gweithio i'n sefydliad

Bwrdd Iechyd Prifysgol Betsi Cadwaladr yw'r sefydliad iechyd mwyaf yng Nghymru, gan ddarparu amrywiaeth lawn o wasanaethau sylfaenol, cymunedol, iechyd meddwl ac ysbyty acíwt i boblogaeth o tua 676,000 o bobl ledled chwe sir Gogledd Cymru (Ynys Môn, Gwynedd, Conwy, Sir Ddinbych, Sir y Fflint a Wrecsam). Caiff rhai ardaloedd yng Nghanolbarth Cymru, Swydd Gaer a Swydd Amwythig eu cwmpasu gan y Bwrdd Iechyd hefyd.

Mae'r Bwrdd Iechyd yn cyflogi tua 16,500 o staff ac mae ganddo gyllideb o tua £1.4 biliwn. Mae'n gyfrifol am redeg tri ysbyty cyffredinol dosbarth (Ysbyty Maelor Wrecsam yn Wrecsam, Ysbyty Glan Clwyd ger y Rhyl ac Ysbyty Gwynedd ym Mangor), yn ogystal â 22 o ysbytai acíwt a chymunedol eraill a rhwydwaith o fwy na 90 o ganolfannau iechyd, clinigau, timau iechyd cymunedol ac unedau iechyd meddwl. Mae'r Bwrdd Iechyd hefyd yn cydlynu gwaith 121 o bractisau meddygon teulu a gwasanaethau'r GIG a ddarperir yn y gogledd gan ddeintyddion, optegwyr a fferyllfeydd.

Mae'r Bwrdd Iechyd yn ardal fwyaf gogleddol Cymru, ger Parc Cenedlaethol prydferth Eryri ac mae'n ymestyn dros ardal ddaearyddol enfawr ac amrywiol. Mae'r morlin yng Ngogledd Cymru ymhlith y rhai mwyaf amrywiol ac ysblennydd yn y DU, gan gynnig cyfleoedd heb eu hail i gymryd rhan mewn gweithgareddau awyr agored mewn ardal o harddwch naturiol eithriadol.