Trosolwg o'r swydd

Mae'r is-adran radioleg yn ehangu o safbwynt gweithlu a chaledwedd er mwyn ateb galwadau ein llwyth gwaith uwch. Mae'r bwrdd iechyd (BIPBC) yn cydnabod pwysigrwydd radioleg wrth fodloni safonau cenedlaethol a lleol mewn sawl agwedd ar ofal iechyd, ac mae'n buddsoddi er mwyn ehangu'r ddarpariaeth radioleg.  Rydym wrthi'n gweithio tuag at y Safon Ansawdd ar gyfer Delweddu (QSI).

Mae ein gwasanaeth meddygaeth niwclear a PET CT yn cynnal ystod eang o ddelweddu diagnostig gan gynnwys delweddu hybrid arbenigol sy'n cynorthwyo ein gwasanaeth orthopedig lleol, yn ogystal â darparu delweddu hybrid ar gyfer Ysbytai Orthopedig arbenigol trydyddol (Croesoswallt). Ar hyn o bryd mae PET-CT yn cynnig sganio ar gyfer ystod gynyddol eang o ddangosyddion gan gynnwys delweddu oncoleg 18F-FDG, 18F-PSMA a Choline, yn ogystal â delweddu heintiau. Ymgymerir ag ystod eang o waith camera gama confensiynol, gan gynnwys gwasanaeth MPI dan straen. Ar hyn o bryd, cynhelir y gwasanaeth hwn ar GE Hawkeye yn Ysbyty Glan Clwyd, a GE NM870 DR yn Ysbyty Wrecsam Maelor.

 Yn ddiweddar, mae'r Bwrdd Iechyd wedi cymeradwyo achos busnes amlinellol ar gyfer Canolfan Ragoriaeth gyfunol, newydd ar gyfer Meddygaeth Niwclear a PET-CT i'w datblygu a'i hadeiladu'n bwrpasol ar safle Ysbyty Glan Clwyd. Gyda chefnogaeth y comisiynydd (y Cyd-bwyllgor Comisiynu), mae'r Achos Busnes Amlinellol hwn bellach yn aros am gymeradwyaeth derfynol gan Lywodraeth Cymru, cyn adeiladu a chaffael, gyda disgwyl iddo agor yn 2027.

Prif ddyletswyddau'r swydd

Bydd cyfle gan yr ymgeisydd llwyddiannus i gyfrannu at lwyth gwaith cyffredinol ei adran gan gynnwys addysgu hyfforddeion radioleg, myfyrwyr israddedig, a staff ysbytai eraill. Mae radiolegwyr yn cyfrannu at rota ar alwad sy'n elwa o wasanaethau cwmni allanol dros nos a rhan o'r penwythnos a theleradioleg gartref. 

Anogir a chefnogir gweithgareddau ymchwil ac addysgu ac mae rhaglen hyfforddi lwyddiannus iawn o hyfforddeion arbenigol yn yr adran Radioleg. Mae gan BIPBC gysylltiadau cryf â Phrifysgol Cymru, Bangor, sy'n rhoi cyfle i ddeilydd y swydd ddatblygu cysylltiadau ymchwil a/neu addysgu â'r Sefydliad Addysg Uwch hwn. Mae Ysgol Feddygol ym Mangor hefyd, gyda chyfleoedd i gymryd rhan mewn addysgu.

Bydd trefniadau gweithio hyblyg yn cael eu hystyried a chroesewir trafodaethau ynghylch gofynion yr ymgeisydd, a sut y gellir darparu ar eu cyfer. Mae'n bosibl trafod gweithio oriau estynedig ac oriau cywasgedig. Mae'r adran Radioleg hefyd yn darparu gorsafoedd gwaith i glinigwyr er mwyn iddynt adrodd o gartref ac i gefnogi cynllun swydd amrywiol a chydbwysedd gwell rhwng bywyd a gwaith. 

Disgwylir i'r ymgeisydd llwyddiannus gael ei fentora gan gydweithiwr sy'n feddyg ymgynghorol a gaiff ei bennu ar adeg y penodiad er mwyn cynorthwyo gyda'r trosglwyddiad a'r blynyddoedd cynnar o weithio yn y Bwrdd Iechyd. 

Gweithio i'n sefydliad

Bwrdd Iechyd Prifysgol Betsi Cadwaladr (BIPBC) yw’r sefydliad iechyd mwyaf yng Nghymru, ac mae ganddo gyllideb gwerth mwy nag £2.4 biliwn ac mae'n cyflogi mwy na 20,000 aelod o staff yn ei weithlu. Mae'r Bwrdd Iechyd darparu gwasanaethau sylfaenol, cymunedol, iechyd meddwl ac ysbytai aciwt ar gyfer poblogaeth Gogledd Cymru.

Mae BIPBC yn darparu ystod lawn o wasanaethau sylfaenol, cymunedol, iechyd meddwl a gwasanaethau ysbytai acíwt ac arbenigol mewn 3 ysbyty acíwt, 22 ysbyty cymunedol a rhwydwaith o ganolfannau iechyd, clinigau, canolfannau timau iechyd yn y gymuned ac unedau iechyd meddwl. Mae hefyd yn cydlynu neu’n darparu gwaith practisau meddygon teulu a gwasanaethau’r GIG a ddarperir gan ddeintyddion, optegwyr a fferyllwyr ar draws y rhanbarth.

Mae'r Bwrdd Iechyd yn system iechyd integredig sy'n ymdrechu i ddarparu gofal tosturiol rhagorol gan gydweithio â'r sector cyhoeddus a sefydliadau statudol eraill, a sefydliadau yn y trydydd sector.