Trosolwg o'r swydd

Gwahoddir ceisiadau ar gyfer swydd Radiolegydd Ymgynghorol gyda diddordeb is-arbenigedd mewn Radioleg y Fron, Gastroberfedd (GI), ac Oncoleg, ond rydym yn hapus iawn i drafod darparu ar gyfer unrhyw ddiddordebau arbenigol eraill.

Mae'r uwch adran radioleg yn ehangu o ran gweithlu a chaledwedd i fodloni gofynion ein llwyth gwaith cynyddol. Mae'r Bwrdd Iechyd (BIPBC) yn cydnabod pwysigrwydd radioleg wrth ddarparu safonau lleol a chenedlaethol mewn llawer o elfennau o ofal iechyd, ac maent yn buddsoddi yn ehangiad Radioleg.   Ar hyn o bryd rydym yn gweithio tuag at y Safon Ansawdd ar gyfer Delweddu (QSI).

Prif ddyletswyddau'r swydd

Bydd gan ddeilydd y swydd gyfrifoldeb am addysgu, sicrhau ansawdd, a rheoli gwasanaethau o fewn ei feysydd arbenigol a bydd yn cyfrannu at lwyth gwaith ehangach yr adran yn amodol ar drafodaethau cynllun swydd, gan gynnwys Radioleg Gyffredinol, rotas ar-alwad ac addysgu hyfforddeion Radioleg, Myfyrwyr Israddedig, a staff ysbyty eraill.

Mae gennym gysylltiadau cryf â Phrifysgol Bangor a byddai gan yr ymgeiswyr y cyfle i ddatblygu cysylltiadau ymchwil a/neu gysylltiadau addysgu gyda'r Brifysgol.  Mae cyfleoedd ar gyfer ymchwil wedi cael eu gwella gyda statws Bwrdd Iechyd Prifysgol yn cysylltu â phrifysgolion Bangor a Wrecsam.  Mae'r gyfarwyddiaeth hefyd yn cyflogi dau Radiograffydd Ymchwil i gefnogi'r gwaith hwn.

Darperir cymorth ysgrifenyddol a swyddfa fel y  bo'n briodol.  Bydd gan yr ymgeisydd llwyddiannus weithfan bersonol gyda mynediad e-bost a rhyngrwyd.  Mae digonedd o gyfleusterau MDT gan gynnwys ystafelloedd Seminar Radioleg gyda mynediad at fideo-gynadledda.

Mae Meddygon Ymgynghorol yn cyfrannu i reoli risg clinigol drwy fonitro digwyddiadau clinigol a chymryd rhan mewn cyfarfodydd ynglŷn ag anghysondebau adrannol.  Mae cydymffurfio â pholisïau cwynion a chyfreitha'r adran yn cyfrannu at reoli risg yn dda. Disgwylir cadw cofnodion da a disgwylir i feddygon ymgynghorol gymryd rhan mewn Archwiliadau. Caiff ymchwil ei annog yn enwedig pan fo hynny'n addas i ddatblygiad proffesiynol yr ymgeisydd llwyddiannus ac i ddatblygiad gwasanaeth y gyfarwyddiaeth. 

Gweithio i'n sefydliad

Bwrdd Iechyd Prifysgol Betsi Cadwaladr (BIPBC) yw’r sefydliad iechyd mwyaf yng Nghymru, ac mae ganddo gyllideb gwerth mwy nag £2.4 biliwn ac mae'n cyflogi mwy na 20,000 aelod o staff yn ei weithlu. Mae'r Bwrdd Iechyd darparu gwasanaethau sylfaenol, cymunedol, iechyd meddwl ac ysbytai aciwt ar gyfer poblogaeth Gogledd Cymru.

Mae BIPBC yn darparu ystod lawn o wasanaethau sylfaenol, cymunedol, iechyd meddwl a gwasanaethau ysbytai acíwt ac arbenigol mewn 3 ysbyty acíwt, 22 ysbyty cymunedol a rhwydwaith o ganolfannau iechyd, clinigau, canolfannau timau iechyd yn y gymuned ac unedau iechyd meddwl. Mae hefyd yn cydlynu neu’n darparu gwaith practisau meddygon teulu a gwasanaethau’r GIG a ddarperir gan ddeintyddion, optegwyr a fferyllwyr ar draws y rhanbarth.

Mae'r Bwrdd Iechyd yn system iechyd integredig sy'n ymdrechu i ddarparu gofal tosturiol rhagorol gan gydweithio â'r sector cyhoeddus a sefydliadau statudol eraill, a sefydliadau yn y trydydd sector.